Ծնվել է Երևանում: Մանկական ու պատանեկան երազանքը ռադիոհաղորդավար դառնալն էր՝ հոր՝ ՀԽՍՀ վաստակավոր արտիստ, Հայաստանի ռադիոյի և հեռուստատեսության պետական կոմիտեի առաջատար հաղորդավար Մարատ Հալաջյանի հետևողությամբ։ 1971 թվականին հայրը հանկարծամահ է լինում, և Երևանի պոլիտեխնիկական ինստիտուտի երկրորդ կուրսում սովորող երիտասարդին հաղորդավար դառնալու երազանքն առժամանակ լքում է: 1974 թվականին ավարտելով ինստիտուտը՝ Կարեն Հալաջյանն աշխատանքի է անցնում միութենական նշանակության ռազմարդյունաբերական մի մեծ ձեռնարկության արտադրամասերից մեկում: Քսան տարիների ընթացքում անցնում է մասնագիտության բոլոր փուլերը՝ զբաղեցնելով ինժեներից մինչև գործարանի և արտադրական հսկա միավորման գլխավոր տնօրենի՝ արտադրության գծով տեղակալի պաշտոնները: Արդյունաբերության հետ կապված գործունեությունն ավարտում է Երևանի գործարաններից մեկի տնօրենի պաշտոնում՝ 1994 թվականին: Այնուհետև Մոսկվայում վարում է ֆինանսական գործունեություն՝ աշխատելով որպես բանկերից մեկի նախագահի տեղակալ: 
2011 թվականի հունվարին Կարեն Հալաջյանին առաջարկվում է ղեկավարել «Վեմ» ռադիոկայանը, որն էլ սիրով նա անում է առ այսօր: «Մտորումներ», «Կրոններ և մշակույթներ» հաղորդաշարերի հեղինակն ու վարողն է, նաև որպես հաղորդավար ներկայացնում է «Երաժշտական թատրոնի գոհարներ» հաղորդաշարը: 

«Վէմ» ռադիոկայանի հիմնադիր և գլխավոր խմբագիր

2002 թվականին հիմնել է «Վէմ» հոգևոր-մշակութային ռադիոկայանը: Հայ Առաքելական Սուրբ Եկեղեցու քահանա է, աստվածաբան, գիտնական, սցենարիստ, պրոդյուսեր, հասարակական գործիչ և ուսուցիչ, ՀՀ նախագահի՝ կրթության գծով խորհրդական (2013 թվականից), Կրթության գերազանցության ազգային ծրագրի տնօրեն, «Այբ» կրթական հիմնադրամի համահիմնադիր և «Այբ» դպրոցի հոգաբարձուների խորհրդի նախագահ, «Գանձասար» աստվածաբանական կենտրոնի և «Վէմ մեդիա արուեստներ»-ի հիմնադիր և տնօրեն, «Արարատից Սիոն» փաստագրական ֆիլմի սցենարիստ և պրոդյուսեր, «Գիրքը» ֆիլմի ստեղծագործական պրոդյուսեր և գաղափարի հեղինակ։ Տ. Մեսրոպ քահանա Արամյանը հեղինակ է գրքերի, հոդվածների, հետազոտական աշխատանքների, ռադիոհաղորդումների, հեռուստահաղորդումների, ֆիլմերի, ինչպես նաև կրթական նախագծերի ու ծրագրերի։

 ՀՀ վաստակավոր արտիստ, լրագրող Սարգիս Նաջարյանը ծնվել է 1950 թ. Երևանում։ Ավարտել է Երևանի Վալերի Բրյուսովի անվան օտար լեզուների ինստիտուտը և Մոսկվայի մշակույթի և արվեստի պետհամալսարանի թատերական ֆակուլտետի դերասանի վարպետության հեռակա բաժինը: 
        1971 թվականին մասնակցել է հաղորդավարների մրցույթին և ընդունվել Հեռուստառադիոպետկոմ։ Խոսքարվեստի ուսուցիչներն են եղել Մարատ Հալաջյանը, Ջոն Հակոբյանը, Լիա Կարապետյանը, Հայկուհի Գարագաշը և Հրաչուհի Ջինանյանը: 
        Երկար տարիներ մասնակցել է «Հայֆիլմ» կինոստուդիայի ֆիլմերի կրկնօրինակման թարգմանչական և խմբագրական աշխատանքներին, եղել է բազմաթիվ տոնակատարությունների, Հայֆիլհարմոնիայի կազմակերպած համերգների հանդիսավար։
        «Վեմ» ռադիոկայանում աշխատում է հիմնադրման օրվանից՝ 2002 թվականից, որպես հաղորդավար: Նրա ձայնն ամեն օր հնչում է ռադիոկայանի եթերից «Գանձասար» հաղորդաշարում, ինչպես նաև ամենշաբաթյա «Համաշխարհային դասական երաժշտություն», «Մեր կինոն», «Հայկական վանքեր և սրբատեղիներ» հաղորդումներում:  
          2014 թվականից «Կոմիտաս` հավերժի ճամփորդը» մոնոներկայացմամբ հանդես է եկել Գերմանիայում, Հունաստանում, Մոսկվայում, Տուլայում, Կալուգայում, Հորդանանում, Արաբական Միացյալ Էմիրություններում, Ավստրալիայում, Երևանում, Գավառում:
          Պարգևատրվել է բազմաթիվ մեդալներով և պատվոգրերով:      

Ծնվել է 1948 թ. հոկտեմբերի 6-ին Երևանում: 1966 թվին ավարտել է Երևանի Լևոն Արիսյանի անվան թիվ 127 միջնակարգ դպրոցը` ոսկե մեդալով: Նույն թվին ընդունվել է Երևանի պետական համալսարանի բանասիրական ֆակուլտետ (հայոց լեզու և գրականություն): Ավարտելուց հետո` 1971 թ., աշխատանքի է անցել Հայաստանի պետական հեռուստատեսությունում որպես հաղորդավար: Հեռուստատեսությունում աշխատել է 30 տարի: Լայն է եղել վարած հաղորդումների շրջանակը` լրատվություն, արվեստ, կինո, գրականություն, երաժշտական, ուսումնական հաղորդումներ... 1987 թվականին ստացել է բարձրակարգ հաղորդավարի որակավորում: 2002 թվականից աշխատել է «Վեմ» ռադիոկայանում որպես հաղորդավար: Նրա ձայնը հնչում է «Գանձասար» ռադիոհանդեսում, «Հայկական վանքեր և սրբավայրեր», «Ոսկեփորիկ», «Ինչ են ասում նշանավոր մարդիկ Աստվածաշնչի մասին» հաղորդաշարերում։ Նա նաև ներկայացնում  է եթերով հնչող երաժշտական կատարումները: 

1978 թվականին ավարտել է Երևանի գեղարվեստա-թատերական ինստիտուտի ռեժիսորական ֆակուլտետը, 1980 թվականին՝ Մոսկվայի թատերական արվեստի պետական ինստիտուտի բեմական խոսքի ամբիոնի ասպիրանտուրան։ 1980-1981 թվականներին եղել է Հայաստանի հանրային ռադիոյի ռեժիսոր, 1990 թվականից աշխատում է Հանրային ռադիոյի մշակութային հաղորդումների խմբագրությունում: 1983-1988 թվականներին եղել է Երևանի գեղարվեստա-թատերական ինստիտուտի բեմական խոսքի ամբիոնի լաբորանտ. դասավանդում է նույն ամբիոնում, 2003 թվականից՝ դոցենտ։
2016 թվականից Հայաստանի ազգային մշակութային հեռուստաընկերության մրցանակաբաշխության մասնագիտական ժյուրիի կազմում է։
2002 թվականից աշխատում է «Վեմ» ռադիոկայանում որպես հաղորդավար։ Ընթերցում է «Գանձասար» և «Հայկական վանքեր և սրբատեղիներ» հաղորդաշարների տեքստերը։

Ծնվել է 1957-ին Իջևան քաղաքում: 
1973–74 ուս. տարում ավարտել է տեղի թիվ 3 միջնակարգ դպրոցը: 1976-ին ընդունվել է ԵՊՀ բանասիրության ֆակուլտետ. 3-րդ կուրսն ավարտելուց հետո փոխադրվել է Մոսկվայի Միխայիլ Լոմոնոսովի անվան պետական համալսարանի ժուռնալիստիկայի ֆակուլտետ. ավարտել է 1982-ին: 1983–2002 թթ. աշխատել է Հանրային ռադիոյի (նախկինում` Հեռուստառադիոպետկոմ) արտասահմանի հայության համար հաղորդումների խմբագրությունում (մինչև լուծարվելը) որպես խմբագիր: 2002-ից «Վեմ» ռադիոկայանում վարում է «Ակունք» հեղինակային ռադիոհանդեսը, 2016-ից՝ նաև «Նոր գրքեր» հաղորդաշարը: 1998–99-ին, միաժամանակ, աշխատել է «Իրավունք» թերթի, 2001–04-ին` «Վասն հայության» շաբաթաթերթի, 2005-ին`«Գոլոս Արմենիի» (հայերեն) թերթի խմբագրություններում, 2004-ին խմբագրել է «Շրջադարձ» ամսագիրը (Գևորգ Յազըճյանի հետ. լույս է տեսել 5 համար): 2006-ից աշխատում է «Էդիթ Պրինտ» հրատարակչությունում որպես խմբագիր: 2009-ից «Հայկական հանրագիտարան» հրատարակչության պատասխանատու քարտուղարն է: 
Հեղինակ է տասնյակ հաղորդաշարերի («Վերընձյուղված հայրենիք», «Ազատագրական պայքարի ակունքներում», «Հայկական գաղթավայրեր», «Հայկական հարց», «Պատմության կեղծարարները», «Հայոց արծվաբույն. Արցախ», «Ճակատագրեր», «Դարավերջի խոհեր»,    «Դարը` մեր մեջ, մենք` դարի», «Ազգային ինքնություն», «Հայոց պատմության հիմնահարցեր», «Հայագիտության հիմնախնդիրներ», «Ազգայնականություն. ինչո՞ւ է այն անհրաժեշտ», «Ո՛չ  օտարալեզու դպրոցներին ՀՀ-ում», «Մենք և գիտությունը», «Հանքարդյունաբերությունը և մենք», «Բարոյականությունը և մենք», «Մտորումներ 2015-ի նախաշեմին» և այլն): Թղթակցում է հանրապետական և սփյուռքի հայկական մամուլին:
Հ. Գուլակյանը կազմել և հրատարակել է վաղամեռիկ փիլիսոփա-բանաստեղծ Նարեկ Հովսեփյանի «Նոյյան աղավնու վերադարձը» մաքսիմների և արձակ բանաստեղծությունների ժողովածուն՝ նույնանուն վիպակով հանդերձ: 

Ավարտել է Երևանի պետական համալսարանի բանասիրության բաժինը, նաև Երևանի Առնո Բաբաջանյանի անվան երաժշտամանկավարժական ուսումնարանի դաշնամուրային բաժինը: Բանասիրական գիտությունների թեկնածու է, գիտական բազմաթիվ հոդվածների և մենագրության հեղինակ։ 2016 թվականից «Վէմ» ռադիոկայանում վարում է «Գրական ընտրանի» հաղորդաշարը:

Վարում  է «Վեմ» ռադիոկայանի «Աշխարհայացք» և «Հոգևոր զրույցներ» հաղորդաշարերը: Երևանի պետական համալսարանի Ժուռնալիստիկայի ֆակուլտետի դասախոս է: Աշխատել է լրագրության տարբեր ոլորտներում՝ ամսագիր, կայք, ռադիո, հեռուստատեսություն: Լրագրողական քայլերը սկսել է Հանրային ռադիոյում, այնուհետև աշխատել «Ար», «Հ1», «Արմենիա», «Շողակաթ» հեռուստաընկերություններում: Երկար տարիներ եղել է «Ռադիո Հայ» և «Հայ FM»  ռադիոկայանների լրատվական հաղորդումների վարողը: Որպես վավերագրական ֆիլմերի սցենարիստ աշխատել է «Հ1» և «Արմենիա» հեռուստաընկերություններում: Ունի տպագրված բանաստեղծական շարքեր «Գրական թերթում», «Նոր դար», «Գարուն» և «Անդին» ամսագրերում: Կրթությամբ բանասեր է և մինչև լրագրությամբ զբաղվելը հայոց լեզու և գրականություն է դասավանդել «Մխիթար Սեբաստացի» կրթահամալիրում: 

Ավարտել է Երևանի պետհամալսարանի լրագրության ֆակուլտետը: 
«Վեմում» աշխատում է 2012 թվականից: 
«Ծնողական ժողով» ամենշաբաթյա` կրթական և հոգեբանական ուղղվածությամբ հաղորդաշարի հեղինակն է և վարողը ուղիղ եթերում: 

Աշխատել է Հանրային ռադիոյի «Երևան» ծրագրում, «Առավոտ» օրաթերթում, թղթակցել «Ազատություն» ռադիոկայանին: 2006-ից 2015 թթ․ աշխատել է «168 Ժամ» թերթում։ «Հայկական ժամանակ» օրաթերթի, «Media.am» կայքի, «Ինքնագիր» գրական հանդեսի հեղինակներից է։ 
2006 թ.-ից վարում է «Վէմ» ռադիոկայանի «Հայելի» հեղինակային հաղորդաշարը:

«Վեմում» աշխատում է 2006 թվականից:
Հեղինակն է «Հայ կոմպոզիտորներ և կատարողներ» հաղորդաշարի: Ամեն երեքշաբթի և ուրբաթ երաժշտական ուղիղ եթերն է վարում՝ հաճախ ունենալով ուղիղ եթերային հարցազրույց-հանդիպումներ: «Վեմից» դուրս՝ Կոմիտասի անվան պետական կոնսերվատորիայի «Երաժշտության պատմություն» ամբիոնի դասախոս է, տեղի ձայնադարանի ղեկավար, մասնակցում է գրադարանի խմբագրական աշխատանքներին: Ունի արվեստագիտության թեկնածուի գիտական աստիճան, ավարտել է Կոմիտասի անվան կոնսերվատորիան, մասնագիտությամբ՝ երաժշտագետ:

«Վէմ» ռադիոկայանում աշխատում է 2003 թվականից։
Վարում է «Համաշխարհային դասական երաժշտություն» հեղինակային հաղորդաշարը։  
Մասնագիտությունը՝ երաժշտագետ, դիրիժոր։
«Ըստ Նիկոլայ Բերդյաևի՝ մարդն իր գոյությունն արդարացնում է արարելով, ստեղծագործելով։ Ահա թե ինչու ես շնորհակալ եմ  «Վեմ» ռադիոկայանի ղեկավարությանը և աշխատակազմին, որ ինձ հնարավորություն է տրված ստեղծագործելու, կատարելագործվելու, ինձ պիտանի զգալու և ծառայելու հայրենակիցներիս» (Դանիել Երաժիշտ)։

2011 թվականի օգոստոս ամսից  սկսել է աշխատել «Վեմ» ռադիոկայանում որպես հնչյունային ռեժիսոր և խմբագիր: 
2016 թվականից հեղինակում է «Երաժշտական թատրոնի գոհարներ» հաղորդաշարը:
Ավարտել է Երևանի Կոմիտասի անվան պետական կոնսերվատորիայի դաշնամուրային ֆակուլտետի մագիստրատուրան:

Նրա նշանաբանն է՝ «Առանց երաժշտության կյանքը սխալմունք կլիներ» (Ֆրիդրիխ Նիցշե)։

Աշխատում է «Վեմ» ռադիոկայանում 2016 թ. փետրվարից որպես կայքի ադմինիստրատոր և գրաֆիկական դիզայներ։ «Վեմի» նոր կայքի (2016 թ.) դիզայներն է։

2017 թվականից հեղինակում է «Արվեստի երանգներ» հաղորդաշարը:

Մասնագիտությամբ կոմպոզիտոր ու դաշնակահար է, զբաղվում է նաև պրոֆեսիոնալ լուսանկարչությամբ, ֆոտոմանիպուլյացիայով և նկարչությամբ։ «Վեմի» աշխատանքից ազատ ժամանակ համագործակցում է արտասահմանյան և տեղական զանազան ընկերությունների հետ որպես գրաֆիկական և վեբ դիզայներ։ 

Նրա նշանաբանն է՝ «Չկա աշխարհից խուսափելու ավելի հավաստի միջոց, քան արվեստը,
Եվ չկա նրան միանալու ավելի հավաստի միջոց, քան արվեստը։» (Յոհան Վոլֆգանգ ֆոն Գյոթե)։

Ավարտել է Երևանի Կոմիտասի անվան պետական կոնսերվատորիայի երաժշտագիտական բաժինը (2007), այնուհետև՝ Գիտությունների ազգային ակադեմիայի Արվեստի ինստիտուտի ասպիրանտուրան (2011): 2012 թ. պաշտպանել է թեկնածուական ատենախոսություն և ստացել արվեստագիտության թեկնածուի գիտական աստիճան: 2012 թ.-ից Արվեստի ինստիտուտի գիտաշխատող է, 2015 թ.-ից՝ Կոմիտասի թանգարան-ինստիտուտի գիտաշխատող: Զեկուցումներով հանդես է եկել հանրապետական և միջազգային գիտաժողովներում: Մի շարք գիտական հոդվածների հեղինակ է: 

2008-2012 թթ. աշխատել է «Վէմ» ռադիոկայանում՝ որպես թողարկման օպերատոր:
2011-2012 թթ. վարել է «Երաժշտական կամուրջ», 2013-2016 թթ.՝ «Տաղարան» հեղինակային հաղորդաշարերը: