Հայ Առաքելական եկեղեցու Արցախի թեմի վերաբացման 20-ամյակի տոնակատարության կազմակերպման պետական հանձնաժողովի օրերս հրավիրած նիստում հստակեցվեցին տոնական միջոցառումների ցանկը, ժամանակացույցն ու անցկացման վայրերը:

Ինչպես հայտնում են կառավարության տեղեկատվության եւ հասարակայնության հետ կապերի վարչությունից, հիմնական միջոցառումները տեղի կունենան սեպտեմբերի 27-ին եւ 28-ին. այն համընկնում է Վարագա Սուրբ Խաչի տոնին. 20 տարի առաջ, այդ տոն օրը Գանձասարի օծմամբ ազդարարվեց Արցախի թեմի վերաբացումը:

Ըստ միջոցառումների ցանկի, սեպտեմբերի 27-ին ժամը 11-ին Գանձասարում կմատուցվի սուրբ պատարագ, իսկ հաջորդ օրը Ամենայն Հայոց կաթողիկոս Գարեգին երկրորդը Արցախի պետհամալսարանում կհանդիպի պրոֆ‎եսորադասախոսական կազմի եւ ուսանողներ հետ: Համալսարանի սրահում տեղի կունենա Թեմի հրատարակած` «Արցախի Թեմ» եւ «Գանձասար» գրքերի շնորհանդեսը: Նույն օրը երեկոյան Ստեփանակերտի մշակույթի եւ երիտասարդության պալատում տեղի կունենա հանդիսավոր նիստ, որին կհաջորդի հոգեւոր համերգ: Այդ օրերին մշակույթի եւ երիտասարդության պալատի առաջին եւ երկրորդ հարկերի նախասրահներում կկազմակերպվեն թեմի հրատարակած գրքերի եւ լուսանկարների ցուցահանդեսներ:

Տեղեկացնենք նաեւ, որ սեպտեմբերի 27-ի Սուրբ պատարագը ուղիղ հեռարձակմամբ հնարավորություն կընձեռվի դիտել Արցախի հանրային հեռուստատեսությամբ: Համապատասխան առաջարկ կարվի նաեւ հայաստանյան հեռուստաալիքներին: Միջոցառումները լուսաբանելու համար կհրավիրվեն արտասահմանյան լրատվամիջոցների ներկայացուցիչներ:

Արցախի թեմի առաջնորդ Պարգեւ Արքեպիսկոպոս Մարտիրոսյանի տեղեկացմամբ`տոնական միջոցառումներին մասնակցելու հրավերներ ունեն Ամենայն հայոց կաթողիկոսը, ՀՀ պետական այրեր, խոշոր բարերարներ:


www.hetq.am