Ձայնագրման իր ստուդիայում «Վէմը» նաեւ ձայնագրում է հայ հոգեւոր երաժշտութիւն (շարականներ)` լաւագոյն երգչախմբերի ու մեներգիչների կատարմամբ: 2005 թ. «Վէմ ռիքորդինգզ»-ը թողարկեց իր առաջին` “The Way” («Ճանապարհ») լազերային ձայնասկաւառակը` «Հովեր» կամերային երգչախմբի, ինչպէս նաեւ De Profundis («Ի խորոց») ալբոմը` «Հովեր» երգչախմբի եւ մեներգիչներ Անահիտ Պապայեանի ու Լուսինէ Ղազարեանի կատարմամբ: 2007-ին «Վէմը» թողարկեց «Կոմիտաս քառեակ» (Komitas Quartet) ձայնասկաւառակը, որտեղ զետեղուած են հայ ժամանակակից կոմպոզիտորների գործեր` Կոմիտասի անուան հանրաճանաչ պետական լարային քառեակի կատարմամբ:

«Վէմը» կատարել է հայկական շարականների բարձրորակ ձայնագրութիւն` «Հիլիարդ» անսամբլի կատարմամբ, պատմական Սաղմոսավանքում (12-րդ դար): «Վէմը» որոշիչ դերակատարում է ունեցել բրիտանական աշխարհահռչակ այս անսամբլին 2003 թ. Հայաստան հիւրախաղերի հրաւիրելու հարցում: Ունկնդրէ'ք ձայնագրութիւնները կամ ձե'ռք բերէք դրանք ուղղակիօրէն կայքից:

Հայկ Մելիքեան: Հայ դաշնամուրային երաժշտութիւն

Հայ ժամանակակից կատարողական արուեստի համայնապատկերում ակնառու անհատականութեամբ է առանձնանում Հայկ Մելիքեանը: Նրա կատարումների հերթական` «Հայ դաշնամուրային երաժշտութիւն» խորագրով ձայնասկաւառակը թողարկուեց «CDigital LLC Production»-ի կողմից  2011 թուականին (հնչիւնային ինժեներ` Սերգեյ Գասպարեան, դիզայներ`Արամ Մելիքեան, լուսանկարիչ` Արմէն Զաքարեան): Այն ընդգրկում է 20-րդ դարի երկրորդ կէսի հայ կոմպոզիտորական դպրոցի մի ընտրանի (Արամ Խաչատրեան, Առնո Բաբաջանեան, Ղազարոս Սարեան, Տիգրան Մանսուրեան, Յարութիւն Դանիէլեան), իսկ ժողովրդական «Օրօր» երգի եւ Գրիգոր Նարեկացու «Հաւուն» տաղի փոխադրումներով Հ. Մելիքեանը ներկայացնում է նաեւ իր կոմպոզիտորական արուեստը: Ձայներիզին կից անգլալեզու գրքոյկում ներկայացւում է Հ. Մելիքեանի ստեղծագործական դիմանկարը:

 Շփում

 Մեկնաբանութիւններ (0)

Գնահատել(12)