2009 թուականին Կոմիտասի ծննդեան 140-ամեակի առթիւ Հայաստանի պետական կամերային երգչախումբը՝ խմբավար Ռոբերտ Մլքէեանի ղեկավարութեամբ թողարկեց «Կոմիտաս: Աշխարհիկ եւ հոգեւոր խմբերգեր» կրկնակի ձայներիզը: Նախագծի հովանաւորներն են ՀՀ մշակոյթի նախարարութիւնը, «Վաչէ եւ Թամար Մանուկեան» բարեգործական միութիւնը: Ձայնագրութիւնները կատարուել են Սաղմոսավանքում:

Ձայներիզներում համադրուած են գեղջկական եւ հոգեւոր երգերի՝ Կոմիտասի խմբերգային մշակումները, այսինքն՝ նոյն նախագծի մէջ մէկտեղուել են հայ երաժշտութեան առանցքային ճիւղերը: «Աշխարհիկ խմբերգեր» բաժինը պարունակում է հարսանեկան երգերի, հայ գեղջուկ երգերի ու պարերի երկուական շար, առանձին աշխատանքային, քնարական երգերի խմբերգային մշակումներ:

«Հոգեւոր խմբերգեր» բաժինն ընդգրկում է հատուածներ Պատարագից, Ոտնլուայի եւ Ջրօրհնեաց երգեր: Ձայներիզներին կցուած գրքոյկում ամփոփ ներկայացուած են Կոմիտասի կեանքը` երաժշտագէտ, արուեստագիտութեան թեկանածու Մհեր Նաւոյեանի մեկնաբանութեամբ, Հայաստանի պետական կամերային երգչախմբի գործունէութեան պատմութիւնը եւ Ռոբերտ Մլքէեանի ստեղծագործական ուղին:

Ձայներիզների եւ գրքոյկի գեղարուեստական պատկերազարդումը ներառում է Կոմիտասի, Սաղմոսավանքի, Հայաստանի պետական կամերային երգչախմբի ու Ռոբերտ Մլքէեանի լուսանկարները:

 Շփում

 Մեկնաբանութիւններ (1)

Գնահատել(31)