20 րոպէանոց փաստագրական այս ֆիլմը Հայաստանում օդի աղտոտուածութեան եւ դրա առաջացման հիմնական պատճառների մասին է: Մեքենաներից, գործարաններից, ինչպէս նաեւ թափօնների վերամշակման արդիւնքում մթնոլորտ արտանետուող այրման արգասիքները, վնասակար եւ թունաւոր նիւթերը առողջական լուրջ վտանգ են ներկայացնում մարդկանց եւ էկոհամակարգերի համար:

Վտանգը մեծանում է նաեւ զուգահեռաբար ընթացող մէկ այլ վնասակար երեւոյթի` կանաչ տարածքների ոչնչացման հետեւանքով:

Ֆիլմը թողարկուել է 2006 թուականի մայիսին:

20 րոպէանոց այս ֆիլմը պատմում է «Հայաստան ծառատունկ ծրագրի» եւ «Հայաստանի անտառներ» կազմակերպութեան երկարամեայ համագործակցութեան մասին, ինչի շնորհիւ ՀՀ եւ Արցախի տարբեր տարածքներում արդիւնաւէտօրէն իրականացուել են ծառատնկման եւ անտառային ծածկոյթի վերականգնման աշխատանքներ:
Երկրի յետագայ տնտեսական եւ հասարակական առաջընթացի պայմաններում սա թոյլ կը տայ հնարաւորինս քիչ վնասել ծառային բուսականութեանը:

Արտադրուել է 2006 թուականի յուլիսին:

20 րոպէ տեւողութեամբ այս ֆիլմը բարձրացնում է Հայաստանում թափօնների եւ դրանց ոչնչացման հիմնախնդիրը, ներառեալ կենցաղային աղբը եւ արտադրական թափօնները, որոնք պարունակում են բազմաթիւ թունաքիմիկատներ եւ աղտոտում են օդը, ինչպէս նաեւ, կեղտաջրերի միջոցով, հողը` չափազանց մեծ սպառնալիք ստեղծելով ինչպէս մարդկանց առողջութեան, այնպէս եւ շրջակայ միջավայրի համար: Յատկապէս վտանգաւոր են քլորօրգանական պեստիցիդները, որոնք թաղուած են յատուկ այդ նպատակով 1982 թ. Հայաստանում կառուցուած դամբարանում:
Յատուկ ուշադրութեան առարկայ են պոլիմերային թափօնները, որոնց ծաւալը կազմում է կենցաղային աղբի շուրջ 30 տոկոսը: Դրանցից ձերբազատուելու էկոլոգիապէս միակ արդարացուած եղանակը թափօնների վերամշակումն է:

                                                                               Ֆիլմը թողարկուել է 2006 թուականի օգոստոսին:

Ֆիլմի 20 րոպէների ընթացքում խօսւում է Հայաստանի թանկարժէք հարստութեան` ջրային ռեսուրսների տագնապ յարուցող իրավիճակի մասին: Անթրոպոգեն (մարդածին) գործունէութեան ազդեցութիւնը բնական ռեսուրսների վրայ օրէցօր մեծանում է, իսկ ջուրը հանդիսանում է այդ վնասակար ազդեցութեան առաջնային կրողը:
Ինչեւէ, մենք պէտք է գիտակցենք, որ երբ գազի եւ նաւթի ռեսուրսները վերջնականապէս սպառուեն, մարդկութիւնը հաւանաբար կ'անցնի էներգիայի ստացման այլընտրանքային աղբիւրների կիրառմանը, ինչում անփոխարինելի է մաքուր ջրի դերը:

Թողարկուել է 2006 թուականի հոկտեմբերին:

23 րոպէանոց այս ֆիլմն անդրադառնում է հանքային արդիւնաբերութեան գործունէութեան արդիւնքում մարդկանց առողջութեանը եւ բնութեանը հասցուած հսկայական վնասին: Ներթափանցելով օդի եւ հողի մէջ` հանքային արդիւնաբերութեան արտանետումներն ի վերջոյ յայտնւում են ինչպէս ոռոգման, այնպէս էլ խմելու ջրերում:

Ֆիլմն արտադրուել է 2007 թուականի մարտին: