Սաղմոսարանը կամ Սաղմոսաց գիրքը սաղմոսների ժողովածու է, որն իբրեւ առանձին գիրք հինկտակարանային իմաստութեան գրականութեան մաս է կազմում:

Սաղմոսարանն ընդգրկում է 151 սաղմոս, որոնցից 150-ը կանոնական են, իսկ վերջինը` երկրորդականոն: Սուրբգրային աւանդութեան մէջ Սաղմոսարանը կոչւում է «Գիրք սաղմոսաց Դաւթի», սակայն Սաղմոսների խորագրերում յիշատակւում են նաեւ այլ հեղինակներ` Մովսէս, Սողոմոն, Ասափ, Եման, Եթան, Իդիթուն, Կորխի որդիներ, իսկ սաղմոսների զգալի մասն անանուն է: Սաղմոսաց գիրքն իր ներկայ տեսքին է բերել եւ խմբագրել Եզրաս քահանան (Ք. ծ.ա. 5-րդ դ.):

Հիմք ընդունելով բովանդակային բազմազանութիւնը` սաղմոսները դասակարգւում են չորս խմբի մէջ` 1) փառաբանական, որոնք օրհներգում են Տիրոջ մեծութիւնն ու բարութիւնը, 2) պաղատանքի, վստահութեան ու գոհութեան, որոնք բնոյթով անհատական ու հավաքական են, եւ ապաշխարութիւն, պաղատանք եւ վստահութիւն են արտայայտում, 3) ուսուցողական, որոնք խրատական պատգամներ են բնոյթով, 4) մեսիական, որոնք աւետում են Յիսուս Քրիստոսի գալուստն ու Աստուծոյ Արքայութեան հաստատումը եւ մարգարէանում Նրա կեանքի կարեւորագոյն դրուագների, Նրա մահուան եւ յարութեան մասին: Մենք պարբերաբար ներկայացնում ենք բոլոր 151 սաղմոսները` հատուածական բաժանումով:

Կարդում է՝ Սարգիս Նաջարեանը