«Վէմը» ստեղծուել է, որպէսզի տարածի հոգեւորը եւ օգնի հայերին վերամիաւորուելու իրենց ազգային ու մշակութային ժառանգութեան հետ: Հիմնադիրների թւում են հայեր, ովքեր առաջատար դիրքեր են զբաղեցնում ամենատարբեր ոլորտներում` կրօնական հետազօտութիւններ ու հրատարակչական գործ, բարեգործութիւն եւ խորհրդատւութիւն, ինչպէս նաեւ` Սփիւռքի հանրայայտ դէմքեր եւ այլք: «

Վէմը» «Գանձասար» աստուածաբանական կենտրոնի գիտական գործունէութեան իրաւայաջորդն է: «Գանձասարի» աւելի քան 60 հրատարակութիւնները կազմում են «Վէմի» եւ նրա առաքելութեան հիմնարար, մտաւոր ու բարոյական հէնքը: 2000 թ. վերջին «Վէմը» նախաձեռնեց իր ռադիոհաղորդումների ծրագիրը:

«Վէմի» ռադիոհաղորդումները փաստացիօրէն հեռարձակուել են 2002 թ. յունուարին (FM 101.6, Երեւան), իսկ «Վէմ» ռադիոկայեանի պաշտօնական բացումը տեղի ունեցաւ 2002 թ. ապրիլի 7-ին: Բացման շնորհանդէսը կայացաւ Երեւանի Կոմիտասի անուան կամերային երաժշտութեան տանը, որտեղ տարբեր քաղաքական, գործարար, մշակութային ու կրօնական կազմակերպութիւններ ներկայացնող 300 հիւրերը շնորհաւորեցին «Վէմին»` նորարարական մտայղացման եւ Հայաստանի ռադիոհեռարձակման շուկայ յաջողութեամբ մուտք գործելու առթիւ:

Հայ հոգեւոր երաժշտութեան համապարփակ թուային գանձարան ստեղծելու նպատակով` «Վէմ ռիքորդինգզ»-ը ձեռնամուխ եղաւ մի մեծ ծրագրի` փաստագրել հայ հոգեւոր երաժշտութիւնը արեւմտեան նշագրմամբ եւ աշխարհով մէկ տարածել այս հնագոյն երաժշտական մշակոյթը ներկայացնող բարձրակարգ ձայնագրութիւններ: Հրաշալի ձեւաւորած ստուդիաներն ու արդիական սարքաւորումները հնարաւորութիւն են տալիս բարձրակարգ ձայնագրութիւններ անել ինչպէս ստուդիայում, այնպէս էլ Հայաստանի միջնադարեան եկեղեցիներում ու վանքերում: «Վէմի» ստուդիաների ձեւաւորման համար հայաստանեան «Ակուստիկ» գիտական կենտրոնը 2004 թ. մարտին արժանացել է «Եվրոպայի կամար» (the Arch of Europe) ոսկէ մրցանակին` «Որակ եւ տեխնոլոգիաներ» անուանակարգում:

Սեփական լսարանն ընդլայնելու եւ աւելի մեծ թուով մարդկանց հասանելի դառնալու նպատակով` 2004-ին «Վէմը» ստեղծեց հեռուստատեսային արտադրութեան սեփական` «Վէմ մեդիա արուեստներ» ստուդիան: